Паста со крема од сушени домати

Пастата е типично италијанско јадење и е кралица на Медитеранската исхраната. Вкусно е за на око како и за непцето и многу заситува. Пастата е одлична замена за лебот и стомакот се заситува побрзо со помала количина од неа. Италијанците имаа навика сосот во чинијата со паста да си го измакаат со лепчето кое неизбежно е присутно на трпезата.

Нутриционистите препорачуваат порцијата од паста за ручек или вечера речиси секогаш да биде дополнета со некаква свежа салата. 
Денешниот рецепт на блогов е:

Паста со крема од сушени домати

Незнам како можев досега да не пробам исушени домати и како можев да живеам без нивниот слатко-киселкав вкус. Кога бев малечко девојче во текот на летниот период  се сушеа домати во некои дворови на моето маало и знаев дека домаќинките тоа го правет како начин на конзервирање на доматите за зимница но, искрено потполно сум го изумила. Во италијанските супермаркети пронајдов сушени домати ставени во тегличка и зачинети со сончогледово масло и некои медитерански зачини, а рецептот го земав од една книга со наслов „Зготви и изеди“. Ова песто кое  брзо и едноставно се пртвора во крема многу лесно се подготвува и подолго време може да потрае во фрижидер. Сушените домати го заробуваат витаминот Ц во фазата на сушење на сонце и се одлична замена за свежите домати во есен, зима или пролет.

Состојките за денешниот рецепт се следните:

      -         една тегла сушени домати (180 г)

-         грст од пиноли (преведено од Гугл како борови ореви)

-         пармезан ситно рендан

-         луто суво толчено пиперче

-         магдонос или босилок

-         пармезан јадро рендан за декорација

-         сол

Подготовка:

Во кутијата со кутер од миксерот, се става целата содржина од тегличката заедно со пинолите и пармезанот и се миксаат се додека не се добие густа смеса натречена песто. Повторно се враќа во теглата и се покрива со масло и така конзервирано може да стои во фрижидер до 3 недели.

Доколку се прави пестото од домати во периодот пред ручек го оставате настрана продолжувајќи со варење на пастата во тенџере со вода и сол. Додека пастата се вари, ставате во една тава одредена количина од песто и малку вода од шпагетите што се варат, лутото толчено пиперче и го разредувате и топлите  правејќи го како крема. Кога пастата е варена, ја процедувате и додавате во тавата со кремата од сушени домати, измешувате и сервирате во чиниите. За декорација може јадро или ситно да се изренда уште малку пармезан, наросувате сечкан магдонос или босилок и Вуола ( Voilà ) пастата е готова. Добар апетит!!!

Caprese a modo mio / Моја Капрезе и Scaloppine allattate / Млечни пилешки скалопини

Ме нема,... ме нема и еве денеска ви предложувам 2 летни италијански рецепти кои се прават брзо, не се многу калорични а, се вкусни и се припадници на т.н. здрава храна или Helth food. Овие јадења можете ги послужите како предјадење, (antipasto/антипасто) : CAPRESE / Капрезе, како салата / insalata и второ јадење,(secondo/секондо): Млечен пилешки стек. А, секако во лето кога е жешко можат да бидат изедени и засебно, како единствено јадење со лебче, крекери, солени кифли ...

Првиот рецепт нека биде популарната „CAPRESE al modo mio" / Капрезе на мој начин!

За оригиналната Капрезе ви се потребни : 1 или 2 домати / помодори, 2) моцарела / mozzarela и 3) Басилок / Basilico (оној со јадри листови).

За мојата Капрезе употребив Рукола / Rucola место Босилок. И двата вида на травки се со јак миризлив интензитет, само во прашање е вкусот кој што го преферирате! Јас искрено ги обожавам и двата типа!  Но, ви препорачувам сепак да употребите босилок, како во оргиналниот рецепт. Јас, дома имав само рукола кога ја правев Мојата Капрезе.

Моцарелата ја сечете на потeнки листови, доматите исто така на тeнки кругови (попреку по нивната ширина) и ги редите во чинијата алтернативно: моцарела, домат, босилок (рукола). Зачинувате само со сол, свежо мелен црн бибер и маслиново масло!

Тука запирам со пишувањето, но ќе продолжам попладне!...A, вие можете да го дочитате овој пост во некоја наредна прилика! Чаоооооо! Ciaoooo!

Од тука продолжува вториот рецепт: Млечен Пилешки Стек / Scaloppine di pollo al latte.
За жал немам фотки од текот на подготовката на ова јадење но, едноставно е и лесно може да се направи. Ставам фотки од крајниот дел, сервирано за јадење.

Состојки за 3-4 лица:  300г. пилешки гради тенко исечени на фети / scaloppini, 1 чаша млеко ( од 200/250 мл), брашно, маслиново масло, лукче, рузмарин.  
Ги набрашнувате фетите од пиле и ги оставате да се пржат во тава со маслиново масло до вцрвување од двете страни. 

Во меѓувреме млади или стари компири ги лупите и сечете (моја препорака е да бидат исечени поситно) и ги ставате во тава за печење во рерна. Истурате врз нив маслиново масло, ги протривате со раце и ги израмнувате во тавата. Јас во тавата ставам и некое чешне лук со неговата лушпа и малку рузмарин (свеж или сушен), но доколку не ги сакате јаките миризи на зачините може и без нив. Тавата ја ставате во загреана рерна (на висока t°C) и ги печете се додека компирите не бидат добро црвени а, некои и малку изгорени. Се посолуваат по вкус, веднаш по вадењето од рерна.

Кога пилешките стекови добро се зацрвенети, ги посолувате (пожелба ставате и црн бибер) и дотурате 1 чаша млеко. Го оставате млекото малку да испари, но не целосно, а ако е потребно дотурате и малку вода за на крај да добиете повеке сос. Во пилешките скалопини (стекови) наместо вода, можете да ставите зачинетата вода (вода со популарно речено: вегета) во која се варел некој зеленчук како: грашок, тиквички, печурки, аспарагус... и секако се додава и сварениот зеленчук! На тој начин млечните пилешки стекови стануваат еден комплетен оброк и нема потреба од компири како прилог = contorno/конторно.
Со овој начин на подготовка, пилешките гради стануваат многу кревки и меки за јадење и посебно се погодни за малите дечиња.

Пилешки стек мариниран во млеко и печен во рерна

Млечен пилешки стек со тиквички

                                                                                

Паста ШУЕ ШУЕ

Во лето има денови кога е многу топло, без идеја сте и немате многу воља за готвење ...Или пак сте многу зафатени со др. работи и не сте биле на пазар, во продавница .... Или пак метафорички речено, фрижидерот ви е како отворена уста без заби.....и плаче!
Ве фаќа паника и....уф, лелееее!!!.... што ќе зготвам денеска, немам ништо свежо во фрижидер освен некој домат, некоја пиперка.....
Ете во такви денови, италијанските готвачи и готвачки во најдобриот ресторан по име „ДОМА„  подготвуваат пјато ди паста (порција паста): „СПАГЕТИ ШУЕ ШУЕ„. Сега ке ви го дадам мојот рецепт за подотовката на ова ПРИМО ПЈАТО.
 Состојки за една порција:

• 6-7 Мали шери (како цреши) домати или какви имате (ако треба ќе ги исецкате)
• 10-ина ливчиња Босилок / Базилико или Магдонос
• Лукче
• 1 л-ца Маслиново масло
• Лутко мало пиперче (1,2....зависно колку лутат)
• Паста: СПАГЕТИ (на наше ШПАГЕТИ)

На оган се става тенџерето со вода да зоврие. Во неа додаваме лажиче сол (1:1:1), мешаме и гу ставаме шпагетите да се варат според означеното време.
Во меѓувреме, во една мала тава со масло на послаб оган се пржи до вцрвување ситно исечени парчиња од лукчето (1,2 ... колку што сакате) и пиперчето. Добро зацрвенети се вадат од маслото во чинијата каде ќе се сервираат шпагетите.
Исечените на половина шери домати и искинатиот со раце босилок се ставаат во ароматизираното масло од лукче и се оставаат 3-4 минути да се поварат. Тавата се покрива со капак за полесно да се одвои лушпата од патлиџанот (некој лушпата не ја вади).  Претходно може да се додаде малку од солената вода во која се варат шпагетите. Вака јас ја задоволувам потребата од додавање сол во сосот.
Кога шпагетите се варени Ал Денте, добро се процедуваат и се додаваат во тавата со доматите, се измешуваат внимателно и се сервираат во плитка чинија каде се ставени парченцата од лукче и пиперче. Се придодава со раце искинат босилок или ако преферирате ситно сечкан магдонос, повторно се измешува се заедно и: Е ВУОЛА (француски израз, често употребен кога јадењето се послужува), ПАСТА ШУЕ ШУЕ е готова!