Стек од мисирка со кари, сусам и спанаќ

Денес е убав сончев ден, со вистински  "жешко сонце" .... речиси 22 степени! Го пишувам овој рецепт и веднаш заминувам на долга прошетка ... Сакам да го почуствувам вистинскиот мириз на пролетта и топлото сонце на мојот грб. Во фрижидерот имам спанаќ и месо од мисирка (од градниот дел) што ќе го зготвам за вечера: Стек од мисирка со кари и сусам и спанаќ како гарнир. Ова јадење е многу вкусно и лесно дигестивно. 
Сосојки за 2 лица : 
600 грама спанаќ 250 /300 г стек од мисирка 1 / 2 чаша бело вино брашно кари една шака сусамедна шака ореви од бор (може да се заменат со иситнети обични ореви)3 лажици екстра девственото маслиново масло 2 чешниња лук сол луто пиперче, ако сакате 
Реализација:
Прва фаза: го ставате измиениот и добро исцеден  спанаќ во тенџерето со капак на тивок оган  околу 10-ина минути, мешајќи го повремено .Отткако ќе се обари (практично како на пареа) и излади спанаќот, исцедете го притискајќи го со рацете. Во една тефлонска тава без масло испржете ги боровите ореви, трегнете ги на страна а, потоа и сусамот. Во истата тава, се ставаат 1 лажица маслиново масло (може и сончогледово) и се пржат ситно исечканиот лук и лутото пиперче. Во нив се става исцедениот спанаќ (разделете ја топката од исцеден спанаќ со рацете) и се  заедно убаво измешајте во тавата.
Втора фаза: Стекот го сечете и чукате на тенки парчиња кои ги набрашнувате  со мешавина од брашно и малку кари ( јас ставам кари од око чувствувајќи го мирисот на мешавината). Во тавче со 2 лажици масло пржите до вцрвување 1 чешне лук. Го отстранувате и продолжувате со вцрвување на тенките парчиња од белото мисиркино месо од двете страни. Кога и тие се вцрвенети, се додава 1/2 чаша млеко (додавајќи малку вода ако е потребно), посолувате, наросувате црн бибер, покривате со капак и го варите месото на тивок оган петнаесет минути со вртење на парчињата од двете страни. Речиси на крајот го додавате и сусамот. Распоредете ги стековите во чинијата,  прелијте го со сосот, ставете го и спанаќот и Voilà, готово е ... и јадете го топло! Buon appetitо! p.s. Ако немате бело месо од мисирка можете да го замените со пилешки стек!Ова јадење е со вкус помеѓу Истокот и Западот. Можеби малку е невообичаено за македонците, но препорачувам да се направи. Навистина е многу вкусно и многу здраво.До читање до следниот пост!!! 

Чорба од наут „ала тоскана“ (на тоскански начин)

Иако е пролет и дневните температури се пријатни, навечер сепак застудува и добро би му дошло на нашиот организам да го пунудиме со една чинија на вариво од мешункасти растенија. Денес ке ви го претставам рецептот за чорба од едно многу популарно мешункасто растение во Италија: сушен Слануток или Наут (преведено од Google). Мешункастите растенија оттсекогаш биле протагонисти на Медитеранската кујна а, оттука и на италијанската. Со нив се подготвуваат  многу вкусни јадења кои заситуваат, а имаат и голема хранлива моќ. 

Наутот е мешунка која не содржи заситени масти (полинсатури) присутни во месото а, го има устиот квалитет и квантитет на протеини. Содржат и добра доза на растителни влакна, витамини од групата В и имаат големо богатство од најразлични минерали како: калциум, железо, бакар, калиум, цинк. Мислам дека ова е доволен мотив за да се направи „Чорба од наут“ (сушен слануток). Во чорбата се додава и паста со кус формат како извор на јагленохидрати и добивате јадење како комплетен оброк според медитеранската диета. Вака направената чорба од наут е со потекло од регионот Тоскана и затоа и го добила името : Чорба од наут ала Тоскана (на тоскански начин).

Состојки за две лица:

• 120 г наут, стоен во вода една нок (12 часа)
• 80 г куса паста 
• 2 лажичиња масло
• едно гранче малечко од рузмарин (може и сушен)
• 2 лажици доматно пире
• 1 чешне лук
• малку луто пиперче, според желба и вкус
• сол

Реализација:

Во тенџере со 1 л. малку солена вода  се става да се вари наутот. Во тавче со масло се пржи до вцрвување лукот, се додава и лутото толчено пиперче, иситнетиот розмарин и доматното пире (кое ако е густо претходно го растворате со малку вода).

Кога наутот е варен (ќе биде потребен околу еден час), вадите една половина од водата и го ситните со блендер, практично станува густа смеса. Повторно ја враќате оваа смеса во тенџерето, се додаваат и состојките од тавчето, убаво промешувате со дрвената лажица и го ставате на оган повторно, но само до достигнување на точката на вриење. Тогаш се додава претходно обарената (но, целосно недоварена) паста во насолена вода. Продолжува варењето се додека пастата не стане „ал денте“. Се послужува топла и Voilà, чорбата од наут е готова ... Вuon appetito!!!

п.с. можете да ја подготвите и без паста ако преферирате да ја јадете со леб, но многу е поголемо хранливото дејство ако се јаде со паста.

Торта од лимон со „crenbarries“ (црвени боровинки)

Eтe ... сабота навечер и јас пак сум сама дома. Еднаш неделно, петок или сабота навечер можам да бидам апсолутен господар на домашниот простор! Нерасположението тропа на врата?! Неее ... знаете ли зошто?! Дај... знам дека претпоставувате! Се разбира, го исполнувам просторот со подготвување на слатко изненадување за мојот љубен. Секој пат кога тој се враќа дома (следниот ден), знаејќи како стојат работите, само со љубопитен поглед ме погледнува мило и ми се насмевнува! Би рекла дека за него ова веќе не е зненадување, туку е потврдување на мојата грижа и љубов и тоа многу му се допаѓа. Убаво е да се дава сигурност на луѓето што ги сакаме. Така се чувствуваат безбедни, заштитени, галени ... а, оваа сигурност е уште повеќе посебна поради тоа што е вкусна и мирисна.

Вечерва направив едноставна торта со арома и вкус на лимон. Миризот на јужните ароматични овошја ни се допаѓа на двајцата! Сега, додека го пишувам овој пост го чувствувам миризот на лимон кој доаѓа од рерната ... ммм .... прекрасно!  Оваа торта многу лесно се подготвува, испробана е и тестирана лично од мене! Знам дека има илјада рецепти за торта со арома на лимон, но еве ви го и мојот!

Состојки:

3 јајца

1 чаша природен јогурт

3 чаши брашно

2 чаши шеќер

1 чаша сончогледово масло

1 лимон (рендана кора и сок )

малку сол (прстофат)

1 кесеичка прашок за пециво

Во два длабоки сада за матење се одвојуваат белките од жолчките. Белките се матат како снег а, во садот со жолчките ги додавате сите други состојки, нежно мешајќи со маталката. Потоа се додава и снегот од белките, секогаш мешајќи деликатно и се истура во тава со d = 26 цм, претходно подмачкана и набрашнета. Се пече во претходно загреана рерна на 160°C, околу еден час. Кoга е добро изладена можете да ја украсите со желе од лимон или шеќер во прав. Во алтернатива можете да направите како мене, да ја премачкате со глазура од лимон: шеќер во прав и сок од лимон. Од дозите што ги употрбив (од око) ми излезе малку глазура, затоа тортата дополнително ја посеав и со шеќер во прав. Имајќи дома црвени американски боровинки ставив еден рака и од нив како декорација. Тортата е готова да се јаде отткако глазурата ќе стане сува и тврда.

п.с. Како мерка се употребува чашата од јогурт што ќе го ставите во тортата.

До следниот рецепт, со многу симпатии!

Солена торта со спанаќ како варијанта на македонски зелник со спанаќ

Основно правило во готвењето на храна е што побрзо да се користат намирниците кои сме ги пазарувале. Има производи кои можат да стојат подолго време и да не се консумираат до некој одреден датум. Но, има и такви како: зеленчукот, урдата, некои свежи меки сирења итн. кои немаат долг рок на трајност. Ете, кога имам такви намирници јас правам „Италијанска солена торта“ (Torta salata) , која впрочем е еден вид македонски зелник или сукана пита, исполнета со фил од различни видови на сезонски зеленчук.

Постојат стотици рецепти за солена торта и крајниот резултат секогаш зависи од фантазијата на тој што ги подготвува.

За оваа торта јас користам лиснато тесто, понудено од италијанската прехрамбена индустрија како одлична алтернатива за дома направеното. Овие солени торти се секогаш практични. Во зима се јадат топли но, можат да се консумираат и во лето ладни или на собна температура. Припаѓаат на групата т.н. „Antipasti“ (предјадење) а, може да се послужи и како Секондо (главно јадење), бидејки јајцата се протеини и се одлична замена за месо или риба.

Најчесто, во зима правам солена торта со спанаќ или блитва, кромид или праз и сл. зеленчук.

Состојки за 4 лица:

- 250 г лиснато тесто

- 600 г спанак (блитва)

- 400 г.урда

- 2 јајца

- 1 стек од праз (или 2 главици кромид)

- 3 л-ци масло (се препорачува маслиново)

- мускатно оревче

- сол, црн бибер

1. Спанаќот се чисти, мие и сече поситно. Се става во тефлонска тава на тивок оган да се вари со водата што ја има на себе од миењето и се покрива со капак.

2. Празот се чисти, мие, поситно сече и се пржи на тивок оган во масло. Отткако ке добие стаклест изглед му се додава многу малку вода и се вари до омекнување и испарување на водата. Потоа се додава сварениот и исцеден спанаќ и на посилен оган добро се измешува за да добие вкус. Се остава оваа смеса добро да се излади.

3. Италијанската урда (рикота)се разликува од македонската според технологијата на обработка. Таа е фино ситна и има изглед на крема, не е солена и се позајмува многу во подготовката на солени или благи јадења. Затоа, мој предлог е на македонска урда да додадете помрсно кисело млеко или крем сирење за мачкање за да ја направите помрсна и кремаста. Во урдата се додаваат 1 јајце + белката од второто, се мешаат и на крај се додава правот од мускатното оревче и сол (регулирајте според сопствен вкус). Тука се додава изладениот спанаќ, добро се мешаат до добивање на една хомогена смеса или фил.

4. Лиснатото тесто се одвиткува од конфекцијата и се постила врз тавата со d = 24 см (претходно обложена со хартија за печење). На површината на лиснатото тесто се прават дупчиња со вилушката. Се истура филот, се обликува но, без поголемо притискање. Со разматената жолчка од јајцето се мачкаат со четкичка краевите од тестото по ивицата на тортата а, остатокот се истура во тенок млаз по површината на филот. Се става да се пече во загреана рерна на 180°C околу 40 минути. Извесно време се лади и може да се послужи топла или ладна.

Депуративна салата од спанаќ

Обично по една обилна вечера, следниот ден за ручек или вечера практикувам депурација (чистење) на организмот со обилна порција од салата, во овој случај од спанаќ.
Ги одвоив поситните и кревки листови од купениот спанаќ од пазар и ги употребив за т.н. „депуративна салата“ која ја подготвувам на следниот начин:

Во подлабок сад заедно со измиените листови од спанаќ ставам: исечени парчиња од зелено јаболко (пр. сеуште несозреано јаболко од типот делишес), искршени јатки од ореви, коцкички од тврд кашкавал или тврдо кравјо сирење и зачинувам со соја-сос или „балсамико“ оцет и една лажица од маслиново масло.

За да биде оброкот комплетен додавам уште 50 г интегрален леб (печен на тостер).

Паста со крема од сушени домати

Пастата е типично италијанско јадење и е кралица на Медитеранската исхраната. Вкусно е за на око како и за непцето и многу заситува. Пастата е одлична замена за лебот и стомакот се заситува побрзо со помала количина од неа. Италијанците имаа навика сосот во чинијата со паста да си го измакаат со лепчето кое неизбежно е присутно на трпезата.

Нутриционистите препорачуваат порцијата од паста за ручек или вечера речиси секогаш да биде дополнета со некаква свежа салата. 
Денешниот рецепт на блогов е:

Паста со крема од сушени домати

Незнам како можев досега да не пробам исушени домати и како можев да живеам без нивниот слатко-киселкав вкус. Кога бев малечко девојче во текот на летниот период  се сушеа домати во некои дворови на моето маало и знаев дека домаќинките тоа го правет како начин на конзервирање на доматите за зимница но, искрено потполно сум го изумила. Во италијанските супермаркети пронајдов сушени домати ставени во тегличка и зачинети со сончогледово масло и некои медитерански зачини, а рецептот го земав од една книга со наслов „Зготви и изеди“. Ова песто кое  брзо и едноставно се пртвора во крема многу лесно се подготвува и подолго време може да потрае во фрижидер. Сушените домати го заробуваат витаминот Ц во фазата на сушење на сонце и се одлична замена за свежите домати во есен, зима или пролет.

Состојките за денешниот рецепт се следните:

      -         една тегла сушени домати (180 г)

-         грст од пиноли (преведено од Гугл како борови ореви)

-         пармезан ситно рендан

-         луто суво толчено пиперче

-         магдонос или босилок

-         пармезан јадро рендан за декорација

-         сол

Подготовка:

Во кутијата со кутер од миксерот, се става целата содржина од тегличката заедно со пинолите и пармезанот и се миксаат се додека не се добие густа смеса натречена песто. Повторно се враќа во теглата и се покрива со масло и така конзервирано може да стои во фрижидер до 3 недели.

Доколку се прави пестото од домати во периодот пред ручек го оставате настрана продолжувајќи со варење на пастата во тенџере со вода и сол. Додека пастата се вари, ставате во една тава одредена количина од песто и малку вода од шпагетите што се варат, лутото толчено пиперче и го разредувате и топлите  правејќи го како крема. Кога пастата е варена, ја процедувате и додавате во тавата со кремата од сушени домати, измешувате и сервирате во чиниите. За декорација може јадро или ситно да се изренда уште малку пармезан, наросувате сечкан магдонос или босилок и Вуола ( Voilà ) пастата е готова. Добар апетит!!!

Октопод на Лигуриски начин - Polpo alla Ligure

Аххх ... Лигурија, Џенова, Санта Маргарита, Портофино ... толку прекрасни места со безвременска убавина. Не може да се опише ... само треба да се посети и да се види убавината на природата и архитектурата. Но, затоа може да се вкуси нешто од традиционалната лигуриска кујна, толку многу едноставна но со инзвонредна рамнотежа меѓу плодовите од родната земја и морето.

На блогот досега постирав само еден специјалитет од кујната на прекрасната Лигурија, поточно од Џенова: „Трофие со песто џеновезе“ но денеска постирам и едно „секондо“, типично за лигуриската кујна: „Полпо ала лигуре“ или „Октопод на лигуриски начин“.

Подготовка: лесна – за 4 лица / 395 кал од порција

Состојки:

- октопод од 1 кг свез или замрзнат (или 2-3 помали)

- 700 г компири

- 100 г маслинки црни (со извадена семка)

- 1 чешне лук

- 1 сноп магдонос

- 1 лимон

- е.в.о маслиново масло

- сол и ц.бибер

Компирите се мијат и лупат. На оган се става подлабоко тенџере полно со малку солена вода во која го ставате октоподот (претходно целосно одмрзнат). По 10 минути од варењето се ставаат излупените компири. Се вари уште 35 - 40 минути. Октоподот и компирите се вадат од врелата вода, малку се ладат и се сечат на парчиња. Сите парчиња заедно се ставаат во подлабока сад за послужување. Маслинките се сечкаат и тие се додаваат во садот со парчињата од октопод и компири и се измешуваат. Се додава и измиениот и исушен магдонос исечкан заедно со чешнето лук заради арома се зачинува со 5 лажици масло, сол, малку свежо мелен црн бибер и сок од лимон. Добро се измешува и се служи топло или пак ладно во лето.

Овој специјалитет припаѓа на групата „секонди“ а, за пиење се служи бело или розе вино со овошна нота.

Кајгана со компир и зеленчук „Ала италиана“

Една недела помина отткако се хранам со Light јадења „alla italiana“ и го практикувам сопствениот рецепт за слабеење. Верувале или не ... но, веќе изгубив половина килограм. Воопшто не гладувам и сосем нормално ги изведувам секојдневните активности.
Нема магија во мојот рецепт а, тој е следниот:
- јадам помалку (20 % помал внес на калории)
- го прочистувам организмот со пиење вода (по 2 л во 24 часа)
- избегнувам стрвост
- имам поголема физичка активност (3 пати неделно пливам или секојдневно пешачам по 1/2 час, со брз чеко ).
Сепак, има една мала тајна за успех а, таа е да имаш поддршка и солидарност од домашните. За срека со мене се солидализираат и ги јадат моите light готварии. На овој начин сум максимално мотивирана тие да бидат вкусни, да имаат убава арома и да бидат привлечни за око.
Еве го денешниот Light рецепт:

КАЈГАНА СО КОМПИР И ЗЕЛЕНЧУК „АЛА ИТАЛИЈАНА“
Состојки за 2 лица:

- 3 или 4 јајца (во зависност од нивната големина)
- 400 г компири
- 3 л-ци пармиџано (ситно рендан пармезан или др.вид на потврд кашкавал)
- ½ лажица масло (само ако тавата е тефлон)
- сол, рузмарин и мајчина душичка
- зеленчук по желба (претходно сварен)

Компирите се чистат и сечат на тркала со дебелина од половина центиметар. Се загрева рерната на 200°C. Јајцата се матат како за кајгана и во нив се додава малку сол, сушен рузмарин и мајчина душичка. Тефлонската тава се мачка со масло. Ако се употреби друга тава, советувам да се обложи со хартија за печење. Се редат компирите и врз нив се поросува ренданото пармиџано, потоа се реди втор слој од компири и повторно се поросува пармиџано. Се реди обарениот зеленчук и се истураат изматените јајца внимавајќи да се потполнат празнините меѓу круговите од компири. Тавата се става во загреана рерна на 200°C, околу 10 минути а, потоа температурата се намалува на 170°C. Но, секоја домакинка ја познава рерната од својот шпорет и затоа сама треба да ја регулира температура. Се пече уште 20 до 25 минути. Кајганата се јаде топла а, како прилог се послужува и салата.
За оброкот да биде комплетен според Медитеранската диета треба е да се додадат уште 30 г интегрален леб (печен во сеуште топлата рерна или во тостер).

Пудинг со чоколаден крем

За 4-6 лица

Силиконски калап за пудинг

Состојки

500 мл млеко

150 гр свежа крем павлака/пана

12 гр на желатински ленти

150 гр шеќер

70 g крем од лешник

Подготовка

Во сад се топли млекото со шеќерот. Се трга на страна од топлината и во него се раствора веќе омекнатиот желатин во ладна вода. Промешајте и додадете го кремот од лешник и оставете нека се излади.

Штом смесата ќе почне да се згуснува со миксер изматете ја свежата крем павлака. Ставете ја во смесата мешајќи внимателно. Истурете ја смесата во силиконскиот калап и оставете го пудингот најмалку 6 часови во фрижидер.

Декорирајте со т.н. лушпи од чоколада и лешници.

Ова е оригиналниот рецепт за пудинг со крем од лешници.

Наместо крем од лешник можете да користите чоколаден крем како што го направив јас за пудингот на сликата кој има изглед на „чиз кејк“ (cheese cake) . Калапот беше малку поголем и затоа додадов еден слој бисквити „пишкоти“ малку натопени во кафе. За декорација го поросив со лушпи од чоколадо и бадеми.

Прженици ала Џенова

Овие се типични  прженици што се прават во Џенова и кои можат да се прават во солена или слатка варијанта ако се направи замена на сол со шеќер.

Состојки:

- 1 /2 кг брашно

- 2 жолчки од јајце

- Сол (по вкус)

- квасец 1 пакетче

- масло

Измешајте брашно со вода се додека не се добие амалгам од тесто што ќе биде „доволно„ течно.

Тестото го подготвувате неколку часа пред времето за пржење.

Го ставате маслото да се згрева и во тестото додавате малку сол,  пакетче квасец и две жолчки од јајце.

Добро промешајте и почнете да ставате една по една лажица во маслото. 

Прженициве многу се вкусни но, истотака се и многу мрсни и брзо заситуваат. Можеби затоа најчесто се подготвуваат на народните собирања, саеми и празници.

Препорака: За 2-3 члена доволна е половина доза од напишанава. 

Пржениците треба да добијат заруменета боја од двете страни и со лажица со дупки или пинцета се вадат од маслото и се ставаат на кујнска хартија која што го впива мрсно. Се посолуваат и сервираат топли.